一個人的叉雞飯

2015年8月11日星期二

150809 - 11 [由柏林走過一萬幾公里陸路到香港] - 西安

和諧號到達西安。

時間不太夠，只有三日兩夜，不夠時間上山。只去睇兵馬俑。兵馬俑遺跡真係好大。

西安係一個充滿歷史既地方。周圍都可以見到歷史建築，秦，唐，明朝都有。當然自己唔太識歷史唔識欣賞。

西安啲霧霾仲勁過北京。我諗我有機會黎多次既，不過唔係十年內掛！？

推介泡膜,羊串,牛肉麵

有一點我希望第時可以做好啲既，係啲火車真係同外國差十萬九千里，就算車係做到人地既規格，但係啲乘客一樣樣係咁。周街都見到咩社會主意核心價值，但佢地除左第一點富強, 其他一個都未做到。

雖然我相信大陸變好緊，但唔係三五十年既事，至少俾一二百年。
西安有好多野食既。好多新疆，西藏人。有羊泡饃，羊串，羊腳。。

2015年8月8日星期六

150805 - 08 [由柏林走過一萬幾公里陸路到香港] - 北京

第二次黎到北京，夏天真係好唔同。都係鍾意冬天多啲。今次北京之旅真係好多不愉快事件，唯有自 high 輕輕帶過。

第一，諗住可以住四合院，booking.Com book 左，去到可以話無位。經過滿洲里，甚至北京，我敢講用 booking.Com book 大陸啲旅館真係信唔過。一來，有啲係非法，二來， book 左都可以去到個陣話無位。
好彩佢介紹左身二間俾我地。

去左好多上次去過既地方，不過其實自己有啲想去既都無去，例如雍和府。景點太多，今次新去既有圓明園同798藝術區。呢兩度都好值得一去。

第一日故宮，天安門，王府井。最唔值得去，但未去過又要到一到既景點。王府井可以 skip, 超差。跟住買電話卡，又要120揀號碼，36蚊增值。一日兩鑊。

第二日驚險喇。由於第一日去左既地方唔多，見到人派傳單打電話報左個 local tour。張傳單寫住話100蚊去13個景點。然後三人同行一人免費。( 講真，真係有少少智慧都知咩料, 見到我已經話邊有可能一日去咁多地方，去到三四個都偷笑。) 但三人抵受不住貪小便宜既心理就落左疊 ) 不過唔駛自己搵路去長城喎。佢話朝早仲車埋你睇升旗, 玩完先收錢，咁算啦。

第二朝一早四點起身, 黎既係一架7人車。就出發睇升旗。
一多人我就顛架喇。都係咁啦，要睇住人地個 mon 先睇到。

5：15睇完。走!!! 佢話會車我地去 join 大巴。都等到6/7點先開車。

嘩，黎料，上到車個導遊好似啲層壓式推銷咁，又話去咩景點我講一次，落車唔好再問。去長城，十三陵(外面睇), 咩有包一餐，然後睇唔知乜春乜春自費項目。最後睇埋水立方鳥巢放低大家，唔會送大家返歸。跟住又話準訓覺。好似軍訓咁，勁恐怖。話佢唔知我地報名個陣幾錢，要收團費加自費項目。咁講到明自費，就覺得係唔一定要參加啦。但唔係喎，要俾！本來$200，依加3人$650。佢都痴膠花。又話$500搞掂。跟住我地就話唔俾。

落車，佢話如果我地唔跟，要俾$80/人車費去長城。佢盡量分開啲人唔俾你地傾。因為佢地得二三個導遊，我就話趁機着草，走左入一間餐廳。最怕係佢地找我地麻煩，因為俾左酒店電話佢。咁入左長城之後佢無再追黎。生平第一次上長城係咁着住草上去。

跟住搭車搭左好耐好耐去左圓明園，攰，風雲色變咁去左水立方，鳥巢。夜晚落大雨，食個麵返歸。圓明園比我想像好啲。雖然已經俾人破壞晒。睇手繪圖，我諗本身應該真係好靚。

第三日天壇，好熱好熱好熱好熱。。。。。。。。。。。。。。。。

藝術中心，南鑼鼓巷，簋街。值得去既。

都係個句，冬天去，有 feel 啲，無咁多人。

@由北京往西安和諧號上。
$500幾蚊5個鐘，最貴一程火車。呢程程度既火車先拍得住日本特急咋強國。唉，希望50-100年左右強國真係變得文明啲，咁先同到香港接軌，人真係太多(我好似講左十萬次人太多 -_-)。依加迫人地退步就你，同化香港人，好慘，真係無眼睇。

時代既尖端

2015年8月4日星期二

150804 [由柏林走過一萬幾公里陸路到香港] - 硬座去北京

嗱，33小時滿洲里到北京。由北到南。由涼到熱，由人少到人多。都唔知啲人點出現。

火車上，可一不可再。啲人食野食到周地係，啲人一上車湧去補飛 counter 補飛買床位。

煙味，咩味都有。又唔夠位放行李，厠所又污嘈又臭，個個無熱水好似會死咁，啲位又窄，好心睇片就用耳機，唔好迫隔離位聽。
唉，依加先夜晚7點，點捱到聽晚九點。
完全係挑戰人類極限。我覺得自己煲左33個鐘煙。
去完俄羅B,就發現大陸D杯麵好吃.

嘩, 咁大個女第一次食八寶粥

大陸要幾多年先減少到人口，幾多年先搞好個衛生問題。

不過遇到好人好事，上車等補飛，本身我地已有一個補卧鋪位，但係我自己白痴，諗住大家齊齊坐住去北京，俾左個位人地。點知之後有兩個位再補俾我地，我疊埋心水硬座去北京。點知死魚眼車長見我未有位，搵到多個位俾我！真係太感謝呢位人兄喇 T^T 估唔到到左呢個諗住無人情味既地方都有人咁好人。身上無禮物多謝呢位人兄, 最後朋友B搵到張卡送俾佢.

2015年8月3日星期一

150803 [由柏林走過一萬幾公里陸路到香港] - 滿洲里

呢幾日精彩

到達滿洲里。首先係要過關，係火車站唔知頭唔知路，上左架的士去到關口，直情人跡旱至(我衰, 無乜搵資料,指意其他人)。一人一百 RUB. 有班中國人係邊境等車。再搵人細問之下，原來跟任何車過境就得。終於俾我地搵到一架車載我地過關，但係一齊等既其中一group中國人講野好無禮貌，話人地有叫你一齊上咩。
反而另一group中國人實在太好人, 聽到佢地講,:話晒都係中國人, 有車齊齊上, 但我地最後上車先,掉低左佢地.

過關，聽聞話要三個鐘，過俄羅斯境個邊，開左閘，又無啦啦落閘。

過中國境就好快。

中國境個"外表"好過俄羅斯。
終於到達滿洲里，去搵BOOK左既旅館。問左個人，佢幫我地打電話去問。
等既中途有個係另一間公寓做野既女仔叫我地唔好住，最後聽佢講話唔安全，轉左住佢個間。

跟住沖涼，換衫，出去行下
銀行，超市，火車站換飛，etc...
最正係夜晚食羊排加啤酒。

話就話過到中國境。啲軟件都係一銀樣。

2015年8月2日星期日

150801-03 [由柏林走過一萬幾公里陸路到香港] - 三日兩夜西伯利亞 - 伊爾庫茨克>赤塔>外貝加爾湖>滿洲里(好長...)

今次西伯利亞之旅由西邊出發，莫斯科>伊爾庫茨克>留三日李斯特楊卡>赤塔>外貝加爾湖>滿洲里

諗起有好多未記錄既。總結係, 食完訓, 訓完食。豬既生活。
我地搭左兩種唔同既車。新車20號，舊車44號。
Q.有無 wifi?
A.兩架都係無既。

Q.有無冷氣？
A.新車有，舊車無。不過有冷氣火車厠所無開窗，比較臭。

Q.有無水供應？
A.有熱水凍水，不過作為潔癖港女，自己帶左枝裝水上車。

Q.電源？
A.新車較好，舊車三個頭有兩個係壞既。

Q.厠所如何？
A.舊車望住佢沖落路軌。成日無厠紙囉。水有陣鐵味。

Q.食物如何準備？
A. 食物其實通常停站就有得買，唔駛咁傻仔買好晒，有雞肶，熟雞蛋，杯麵。通常都食杯麵，帶定個兜焗麵，因為麵餅平一半。不過少少糧草都要準備既。同埋去去左一年"旅行"必備川貝膏，唔係賣廣告，但真係有用。同埋個啲清熱去濕沖濟，有用。買左盒內臟JAM,似鵝肝味。

Q.行李？
A.如果有喼/大 backpack，最好 pack 定個背囊上車幾日用，因唔夠位開喼。其實都唔會沖涼架喇，帶套睡衣上車搞掂！

Q: 景?
A: 各位團友, 最靚既景我覺得去到滿洲里附近先有平原睇下, 全程路主要係同圍係樹同雜草, 可能本人係上隔床既朋友, 要落床先睇到風景。

2015年7月31日星期五

150730-31 [由柏林走過一萬幾公里陸路到香港] - 李斯特楊卡Listvyanka

網上完全無到達李斯特楊卡Listvyanka既資料!??
方法是: 64,66巴士直到巴士總站，或者過橋後搭80號。到巴士大樓買飛即可。
有咩玩呢？呢兩日無玩，其實可以去一個Olkhon Island，睇石。到達Listvyanka可以參加Local Tour去.我地就係因為遲左五分鐘所以 miss左一點班車要搭四點個班。

而又因為咁撞到一個唔識講英文但又要同我地係咁吹水既俄國男仔，得21歲，"Vlad 哥", 揹住 backpack hitch hiking 俄羅斯。同佢雞同鴨講, Google Translate一大輪又問我地覺得列寧點!? (姐姐唔識咁深奧既野, 哈哈)。暫時覺得俄羅斯人比~~自大的~~德國人願意講英文。
好彩有呀DeDe帶路，我地間 Guesthouse 要上另外一幢樓搵個婆婆拎鎖匙先入到屋。俾左佢飲包唔知咩中藥沖劑, 咁夠薑10秒KO杯野。
成件事真係塞翁失馬，焉知非福。如果唔係miss左班車, 就撞唔到呀DeDe。

有少少遺憾係唱唔夠錢去Olkhon Island，hea 左幾日係李斯特楊卡。
世界最大既淡水湖, 貝加爾湖。

講下 hea 左啲咩，guesthouse 無 wifi, 咁就兩日睇左三套戲 hea 左兩晚。
Guesthouse 個婆婆有啲惡，連佢個仔都係，我地 blablabla 問佢野，佢話 "Are you listening to me?" 仲有夜晚無啦啦團友B出左屋，有隻貓好凶咁叫, 嚇屎人。
這裡有很多貓。

仲有俾隻蜜蜂針左下係左手食指中指 la 位，第一下勁"俾"痛痛地。好彩無乜野。

這裡的魚很便宜!

2015年7月29日星期三

150725-29 [由柏林走過一萬幾公里陸路到香港] - 四日三夜西伯利亞鐵路 - 莫斯科>伊爾庫茨克

發現我打左一篇長文唔見左!好心傷, 就係關於差D上唔到鐵路既7事。

估都估唔到自己會上西伯利亞橫跨7個時區。第一日上車，夜晚莫斯科上火車就差啲上唔到車，因為佢話要換飛。原來要上番官網Print番張飛, 咁話說我淨係Print左Email send黎個份野, 我就以為拎住呢張紙就得啦，去到火車準備上車先知。

即9衝去問Counter, 點左我地去長途Counter問, 長途CounterAdmin又點我地去另一Counter問,
點知排晒長龍, 排第一個兩個女人又唔肯讓我, 第二個男仔先俾我排先, 淨番15分鐘上車。
Counter大瀋雞同鴨講左大一輪野係都唔出飛俾我地, 由等到講完個輪野差唔多用左廿分鐘，後面啲人都鼓躁起上黎。
而在我覺得絕望時, 團友A提議搵番呀Admin姐姐幫手。最後 admin 就叫我地俾埋 Passport 幫我地搞。好彩係淨番兩分鐘係好多人幫助下趕到上車。但我既心情依然未能平復
過左呢件事之後，認真覺得我地真係未做足準備就去。

~~P,S, 因為一D無禮既說話令我呢幾日火車旅程興過火屎, 不過, 依加已經唔記得團友們講左咩令我咁興~~。

伊爾庫茨克"
我第一個想法係覺得俄羅斯唔係咁落後，但原來，佢個種落後係真係似大陸咁，啲樓起左一半放係度十年。